ڊاڪٽرعبدالرزاق ميمڻ

عبدالرزاق ميمڻ، ڊاڪٽر: سياسي، سماجي ڪارڪن ڊاڪٽر عبدالرزاق ميمڻ ولد حافظ محمد يوسف ميمڻ، 26 آگسٽ 1962ع تي مٽياري شهر ۾ ڄائو. انٽر تائين تعليم مٽياريءَ مان حاصل ڪري، 1981ع ۾ ايل ايم سي ڄام شوري ۾ داخل ٿيو. جتان 1988ع ۾ ايم. بي. بي. ايس جي ڊگري حاصل ڪيائين. ان دور ۾ ئي سياسي ۽ سماجي سرگرمين ۾ حصو وٺڻ شروع ڪيائين. پهرين جساف جو قائم مقام جنرل سيڪريٽري رهيو. ان کان پوءِ ٻين سياسي تنظيمن سان واسطو رکڻ شروع ڪيائين. پاڻ مٽياري شهر جي شاهه لطيف لائبريري جو باني ميمبر ۽ اداري جو پهريون چيئرمين مقرر ٿيو. ان کانسواءِ هن ارشاد ميمڻ سان گڏجي ادبي سرگرمين ۾ به بهرو ورتو ۽ هڪ ادبي ادارو ‘سوجهرو پبليڪيشن’ جي نالي ۾ قائم ڪيو هئائين، جنهن پاران چار ڪتاب: ‘سرمائيداري ۽ سوشلزم’ (ترجمو: ڊاڪٽر عبدالرزاق)، ‘سنڌ جا سور’ (فقير محمد لاشاري جا لکيل ايڊيٽوريل ۽ مضمون)، ‘سنڌڙي منهنجي سورن ۾’ (مرتب ڊاڪٽر عبدالرزاق)، ‘ڇا سنڌي ريڊ انڊين ٿي ويندا’ (غلام نبي مغل جا مضمون) شايع ڪرايائين. ڊاڪٽر عبدالرزاق، مٽياري شهر جي ‘شاهه لطيف سوشل ويلفيئر’ اداري جو چيئرمين ۽ جنرل سيڪريٽري به رهي چڪو آهي. پاڻ هن وقت سنڌ جي سياسي جماعت فنڪشنل ليگ جو ميمبر آهي.

داخلا ۾ استعمال ٿيل تاريخون

1962.08.26  عيسوي

ڊاڪٽر عبدالرزاق ميمڻ ولد حافظ محمد يوسف ميمڻ، 26 آگسٽ 1962ع تي مٽياري شهر ۾ ڄائو.

شخصيتون - ڀاڱي جون ٻِيون داخلائون